新鮮抵食燒海鮮

為食貓好中意黎大角咀呢個小社區揾食，勝在多出色小店。前幾日見朋友去左澧水產食磯燒，咁吸引又點少得我吖~ 雖然過幾日去日本都忍唔住要黎食吓先~ 放工喺尖東去大角咀搭12號巴士,半個鐘就到好方便。

坐低睇吓menu，有2個二人盛都好正咁，一個係磯燒海鮮，另一個係燒肉為主~ 最後我地點左海鮮餐另加2份肉

先黎蟹子沙律, 青瓜切絲比平時食既粗少少,較有口感,夠清新。

 刺身拼盤 : 有蠔,油甘魚,劍魚腩,三文魚(各2件) 每一樣都唔錯, 蠔用法國的,夠哂肥美~

 燒肉啦~ 美國牛小排，色澤鮮明，油花分佈平均，兩邊燒一陣灑上玫瑰岩鹽已經好好味。 牛脷，薄切的，肉質嫩滑柔軟，同樣係灑鹽~ 個人覺得新鮮肉類都係灑少少鹽最好味, 又可以突出肉鮮~

 叫左杯果汁沙冰,仲可以refill 的。

 主角出場啦~ 磯燒拼盤, 有甲羅燒, 鮑魚,元貝,蟶子王,虎蝦,蜆, 蠔, 貴妃蚌(各2件) 呢個陣容，緊係相機食先最緊要啦~

燒蜆，最開心係睇住佢打開殼，睇住入面既水滾緊。

貝類都要先加清酒水，唔係唔夠水份好易乾ga。 蠔，似係之前刺身食果款, 燒完仲突出蠔香。

虎蝦肉質實淨鮮甜,蝦頭仲有d膏流出黎, 好正呀^^

 蟶子王肉質爽脆 ,加左少少餐廳提供既香草牛油, 燒一陣分外香！ 貴妃蚌都好大隻又厚身。

 元貝大大粒,裙邊彈牙，加左牛油好正。
 鮑魚肉厚鮮味十足。

 仲有~~甲羅燒!!!

 出面食既一般係撈好哂, 多數蟹膏為主 呢度可以見到有咩材料: 蟹肉, 蟹膏,蟹子,鵪鶉蛋, 自己撈勻 食落啖啖蟹肉仲有蔥花香味, 真係好好味..好好味..好好味(重要的事要說3次!!!)
 店長(估計係老闆)問我地意見,我都淨係識講甲羅燒好好味, d海鮮好新鮮 !!!
 最後有和牛炒飯, 夠哂熱, 炒得粒粒分明!!

好滿足既一晚 ~ 原來一人前既吉列牛肉定食, 有埋塊板比你燒ga ~ $ 88 真係抵吖